குற்ற வழக்கை நியாயமற்ற காலத்துக்கு நீட்டிப்பது துன்பம்; சுப்ரீம் கோர்ட்டு

புதுடெல்லி,

தமிழகத்தில் மத்திய கலால் வரி இன்ஸ்பெக்டராக பணியாற்றிய பெண் அதிகாரி ஒருவர் கடந்த 2002-ம் ஆண்டு ரூ.300 லஞ்சம் கேட்டதாக வழக்கு தொடரப்பட்டது. இந்த வழக்கில் கைது செய்யப்பட்ட அவர், 31 நாட்கள் சிறையிலும் இருந்தார். அவருக்கு தற்போது வயது 75. ஊழல் தடுப்பு சட்டத்தின் கீழ் தொடரப்பட்ட இந்த வழக்கை விசாரித்த விசாரணை கோர்ட்டு, பெண் அதிகாரிக்கு ஓராண்டு சிறைத்தண்டனையும், அபராதமும் விதித்து உத்தரவிட்டது.

இதை எதிர்த்து தாக்கல் செய்யப்பட்ட மேல்முறையீட்டு மனுவை தள்ளுபடி செய்த சென்னை ஐகோர்ட்டு, பெண் அதிகாரிக்கு கீழ்கோர்ட்டு விதித்த தண்டனையை கடந்த 2010-ம் ஆண்டு உறுதி செய்தது.எனவே சுப்ரீம் கோர்ட்டில் அந்த பெண் அதிகாரி மேல் முறையீடு செய்தார்.

இதை நீதிபதிகள் அஞ்சாரியா, சந்துர்கர் அமர்வு விசாரித்தது.பின்னர் இதில் தீர்ப்பு வழங்கிய நீதிபதிகள், பெண் அதிகாரி அனுபவித்த 31 நாள் சிறையை அவரது தண்டனை காலமாக கணக்கிட்டு குறைத்தனர். அதேநேரம் அபராத தொகையில் ரூ.25 ஆயிரம் உயர்த்திய நீதிபதிகள், அதை அடுத்த மாதம் 10-ந் தேதிக்குள் செலுத்தவும் உத்தரவிட்டனர். தவறினால் கீழ் கோர்ட்டு வழங்கிய சிறைத்தண்டனயை அனுபவிக்க வேண்டும் என்றும் கூறினர்.

இந்த வழக்கில் 22 ஆண்டுகளுக்கு மேலாக விசாரணை நடந்திருப்பதை சுட்டிக்காட்டிய நீதிபதிகள், குற்ற வழக்கு ஒன்றை நியாயமற்ற காலத்துக்கு நீட்டிப்பது ஒரு வகை துன்பம் என கூறினர். தண்டனையை எதிர்த்து மேல்முறையீடு செய்யும் நபர் தினமும் அந்த வழக்கின் தீர்ப்புக்காகக் காத்திருந்து, துயரத்தில் நேரத்தைச் செலவிடுகிறார் என்று கூறிய நீதிபதிகள், இது குற்ற நடவடிக்கைகளை எதிர்கொள்ளும் நபருக்கு மன ரீதியான சிறைத்தண்டனையாக இருக்கும் எனவும் தெரிவித்தனர்.

இன்றைய நீதி நிர்வாக முறையில், நடவடிக்கைகள் பெரும்பாலும் நியாயமற்றதாகவும், தாங்க முடியாத அளவுக்கு தாமதமாக நீடித்தும் வருகின்றன எனவும், எனவே நீண்ட காலம் கடந்து செல்வது ஒரு நபரை மன வேதனைக்கு ஆளாக்குகிறது என்றும் கூறினர்.