2036-–ல் இந்தியாவில் ஒலிம்பிக் போட்டியை நடத்த முயற்சி: மோடி

2036-ம் ஆண்டு ஒலிம்பிக் போட்டியை நடத்துவதற்கு இந்தியா முயற்சித்து வருகிறது என்று பிரதமர் மோடி கூறினார்.

குஜராத் மாநிலம் ஜூனாகத்தில் “சன்சத் கேல் மகோத்சவ்” என்ற நாடாளுமன்ற உறுப்பினரின் வழிகாட்டலில் நடத்தப்படும் விளையாட்டு விழா நடைபெற்றது. இதன் இறுதி நிகழ்ச்சியில் பிரதமர் மோடி காணொலி வாயிலாக பங்கேற்று விளையாட்டு வீரர்கள் மற்றும் இளைஞர்களிடையே பேசினார். அப்போது அவர் கூறியதாவது:-

போட்டியில் பங்கேற்ற வீரர்களின் உற்சாகத்தில் இந்தியாவின் வலிமையை என்னால் காண முடிந்தது. இன்று இந்த வீரர்களிடம் நான் கண்ட நம்பிக்கை, பல லட்சக்கணக்கான இந்திய இளைஞர்களை அதே நம்பிக்கையால் நிரப்புகிறது. அதனால்தான், ஸ்டார்ட்-அப்கள், விண்வெளி, அறிவியல் மற்றும் விளையாட்டுகளில், இந்திய இளைஞர்கள் தங்கள் கொடியை உயர்த்தி வருகிறார்கள்.

இன்று, விளையாட்டுகளில் வாய்ப்புகள் மட்டுப்படுத்தப்படவில்லை. அவை வரம்பற்றவை. நாட்டில் ஒரு சுற்றுச்சூழல் அமைப்பு உருவாக்கப்பட்டுள்ளது. இன்று, ஏழ்மையான குடும்பங்களைச் சேர்ந்த குழந்தை கூட இளம் வயதிலேயே உச்சத்தை அடைய முடியும்.

இந்தியா வரும் ஆண்டுகளில் முக்கிய விளையாட்டு நிகழ்வுகளை நடத்தப் போகிறது. 2030-ம் ஆண்டில், ஆமதாபாத்தில் காமன்வெல்த் விளையாட்டுப் போட்டிகளை நடத்தும். இது உங்களைப் போன்ற இளம் விளையாட்டு வீரர்களுக்கு ஒரு சிறந்த வாய்ப்பாக இருக்கும். அது மட்டுமல்லாமல், 2036-ம் ஆண்டில் மிகப்பெரிய விளையாட்டு நிகழ்வான ஒலிம்பிக்கை நடத்தவும் இந்தியா பாடுபட்டு வருகிறது. இன்று 10 அல்லது 12 வயதுடையவர்கள் 2036 ஒலிம்பிக்கில் இந்தியாவைப் பிரதிநிதித்துவப்படுத்துவார்கள். நாம் அவர்களை கண்டுபிடித்து, வளர்த்து, இப்போதே தேசிய அரங்குக்கு கொண்டு வர வேண்டும். சன்சத் விளையாட்டு விழா இதில் மிக முக்கிய பங்கு வகிக்க முடியும்.

இன்று அனைத்து நாடாளுமன்ற உறுப்பினர்களுக்கும் நான் சொல்ல விரும்புகிறேன். இது உங்களுக்கு ஒரு பெரிய பொறுப்பு. தேசிய மற்றும் சர்வதேச அரங்களிலும், ஒலிம்பிக்கிலும் கூட இந்தியாவின் பெயரை பிரகாசிக்கச் செய்யக்கூடிய திறமையாளர்களை உங்கள் தொகுதிகளில் கண்டறிய வேண்டும். அவர்களுக்கு சாத்தியமான அனைத்து உதவிகளையும் வழங்கி, வழிகாட்ட வேண்டும்.

இவ்வாறு அவர் கூறினார்.