வேண்டுதல்

அம்மாவிற்கு முதலில் ஒரு பெண் குழந்தை பிறந்து, ஒரு மாதத்தில் இறந்து விட்டது. அவரின் அக்காவிற்கும் 2-3 பிள்ளைகள் பிறந்து பின் இறக்க , அடுத்த பிரசவத்தில் பிறப்பது ஆணாக இருந்தால் குருவாயூரப்பனுக்கு " துலாபாரம்" கொடுப்பதாக வேண்டினார்.

     அதே போல் அம்மாவும் தன் பிரசவத்தில் அப்படிச் செய்ய , கூட்டுக்குடும்பத்தில் அனுமதி பெறுவது சிரமம் என்பதால் , ஒரு எளிமையான வேண்டுதலை அதே "குருவாயூரப்பன்" மீது வைத்தார்.

      பிறக்கும் குழந்தை ஆணாக இருந்து உயிரோடிருந்தால் அவனுக்கு, "கண்ணன்" எனப் பெயரிட்டு தான் உயிருள்ளவரை அழைப்பதாக வேண்டிக்கொண்டார்.

     பிரார்த்தனையின் பலனாக பிறந்த என்னைத் தன் உயிர் உள்ள வரை , அவர் கண்ணன் என்றே அழைத்தார். மற்றவருக்குத்தான் பதிவில் உள்ள பெயர்.

     " காற்றில் வரும் கீதமே என் கண்ணனை அறிவாயா" என்ற நடிகர் "ஸ்ரீகாந்த் " படத்தில் இடம் பெற்ற பாடல் அம்மாவிற்கு மிகவும் பிடிக்கும்.

    இப்போதும் அப்பாடல் கேட்டால் , "அம்மாவின் நினைவு" என்னுள் வந்து போகும். 

" கண்ணா" என்றழைக்க அந்த அம்மா தான் இன்று இல்லை, மறைந்து 9 ஆண்டுகள் ஆகிவிட்டன.

     என் 48வது வயதில் அம்மாவின் சார்பில், குருவாயூரப்பனை நேரில் தரிசித்தேன், ஒரு முறை கூட அவரைப் பார்த்திராத அம்மாவிற்காக....

ஸ்ரீகாந்த்

திருச்சி