நாடாளுமன்றத்தில் ஞாயிற்றுக்கிழமை பிப்.1ம் தேதி மத்திய பட்ஜெட்: சபாநாயகர் ஓம் பிர்லா அறிவிப்பு

புதுடெல்லி, ஜன.-

மத்திய பட்ஜெட் வருகிற 1-ந்தேதி (ஞாயிற்றுக்கிழமை) தாக்கல் செய்யப்படும் என சபாநாயகர் ஓம் பிர்லா தெரிவித்தார்.

நாடாளுமன்ற பட்ஜெட் கூட்டத்தொடர் வருகிற 28-ந் தேதி தொடங்குகிறது.

ஆண்டின் முதலாவது தொடர் என்பதால் இரு அவைகளின் கூட்டுக்கூட்டத்தில் ஜனாதிபதி திரவுபதி முர்மு உரை நிகழ்த்துகிறார்.

அதைத்தொடர்ந்து பொருளாதார ஆய்வறிக்கையை நிதி அமைச்சர் நிர்மலா சீதாராமன் தாக்கல் செய்வார் என எதிர்பார்க்கப்படுகிறது.

ஆண்டுதோறும் பிப்ரவரி 1-ந்தேதி மத்திய பட்ஜெட் தாக்கல் செய்வதை பா.ஜ.க. அரசு கடைப்பிடித்து வருகிறது. ஆனால் இந்த ஆண்டு 1-ந்தேதி ஞாயிற்றுக்கிழமை என்பதால் அன்றைய தினம் பட்ஜெட் தாக்கல் செய்யப்படுமா? என்பது கேள்விக்குறியாக இருந்தது.

ஆனால் திட்டமிட்டபடி 1-ந்தேதி அதாவது ஞாயிற்றுக்கிழமையிலேயே மத்திய பட்ஜெட் தாக்கல் செய்யப்படும் என மக்களவை சபாநாயகர் ஓம் பிர்லா நேற்று அறிவித்தார்.

இதன் மூலம் 1-ந்தேதி பட்ஜெட் தாக்கல் செய்வது உறுதியாகி உள்ளது. நிதி அமைச்சர் நிர்மலா சீதாராமன் தாக்கல் செய்யும் 9-வது பட்ஜெட் ஆகும்.

முன்னாள் நிதி அமைச்சர் மொரார்ஜி தேசாய் 10 பட்ஜெட் தாக்கல் செய்ததே அதிகபட்ச சாதனையாக உள்ளது.

வருகிற 28-ந்தேதி தொடங்கும் பட்ஜெட் தொடர் ஏப்ரல் 2-ந்தேதி வரை நடக்கிறது. இதில் முதல் பகுதி அடுத்த மாதம் (பிப்ரவரி) 13-ந்தேதியுடன் முடிவுறுகிறது.

பின்னர் 2-ம் கட்ட பட்ஜெட் தொடர் மார்ச் 9-ந்தேதி தொடங்குகிறது.

மத்திய பட்ஜெட் தயாரிப்பு பணிகள் இறுதிக்கட்டத்தை எட்டி உள்ளது. பட்ஜெட் தொடர்பாக மாநில நிதி அமைச்சர்களுடன் மத்திய நிதி அமைச்சர் நிர்மலா சீதாராமன் சமீபத்தில் ஆலோசனை நடத்தி இருந்தது குறிப்பிடத்தக்கது.