ஜோக் உருவாகும் விதங்களில் இதுவும் ஒன்று

ஒரு சாதாரண தகவலை ஜோக்காக மாற்றும் விதம்...

அப்பா பையனிடம் கேட்கிறார்:

" என்னடா அஞ்சு வருஷமா படம் டைரக்ட் பண்ணப் போறேன்னு சொல்லிட்டே இருக்கே... எப்படா பண்ணப் போறே...!? "

பையன் பதில் சொல்றான்...

" அப்பா... இப்ப கூட ஒரு படம் டைரக்ட் பண்ணி முடிக்கப் போறேன்... அதுவும் கிளைமேக்ஸை அரக்கோணத்துலேயும், கும்பகோணத்துலேயும் எடுக்கப் போறேன்..! "

இந்த உரையாடலில்

 எந்த ஜோக்கும் கிடையாது...

இதை ஜோக்காக மாற்றலாமா...?

அப்பா பையனிடம் கேக்கற கேள்வியில் மாற்றமில்லை...

பையன் பதிலில் ஒரு மாற்றம்...

" அப்பா... இப்பக்கூட ஒரு படம் டைரக்ட் பண்ணி முடிக்கப் போறேன்... அதுவும் கிளைமேக்ஸை ரெண்டு கோணத்துல எடுத்துட்டுருக்கேன்...! "

அப்பா ஆச்சரியத்துடன் கேட்கிறார்...

" அப்படியா...!? "

பையன் பதிலளிக்கிறான்...

" ஆமா... ஒண்ணு அரக்கோணத்துல... இன்னொண்ணு கும்பகோணத்துல...! "

இரண்டு உரையாடல்களிலும் சொல்ல வந்த தகவல் ஒன்றுதான் என்றாலும் இரண்டாவது உரையாடலில் சிரிப்பு வருகிறதல்லவா...!!!

-------------------------------------------

அடுத்த உரையாடல்...

மனைவி ( கணவனிடம்):

" ஏன் ரொம்ப சோகமா இருக்கறீங்க...!? "

கணவன் அதன் காரணத்தை சாதாரண தகவலாக கூறுதல்:

" டிக்கெட் எடுக்க கியூவில் நிற்கும் போது எவனோ பர்ஸை பிக்பாக்கெட் அடிச்சிட்டான்...!! "

இந்த தகவலை சற்று மாற்றி சிரிப்பு வரும்படிக் கூறுதல்...

" டிக்கெட் எடுக்க வரிசையில நிக்கறப்ப எவனோ கை வரிசைய காட்டிட்டான்டி... என்னோட பர்ஸ் போச்சு...!!! "

இதிலும் தகவல் ஒன்றுதான்...ஆனால் இரண்டாவது உரையாடல்தான் சிரிப்பை வரவழைக்கும்.

இது போல சிந்தித்தால் அனைவருமே ஜோக்குகளை உருவாக்கி மகிழலாம்... மகிழ வைக்கலாம்...!!!

-லட்சுமி ஆவுடைநாயகம்,

மடிப்பாக்கம்