அசாமில் ரூ.11 கோடி மதிப்புள்ள போதைப்பொருள் பறிமுதல்

திஸ்பூர்,

அசாம் மாநிலம் கர்பி அங்லாங் மாவட்டத்தில் அசாம்-நாகாலாந்து மாநிலங்களுக்கு இடையேயான எல்லையில் போலீசார் வழக்கமான ரோந்து பணியில் ஈடுபட்டனர்.

திலாய் பகுதியில் 6 மைல் தொலைவில் ஒரு இடத்தில் சந்தேகத்திற்கு இடமான வகையில் வேகமாக சென்ற ஒரு லாரியை நிறுத்தி சோதனை செய்தனர். சோதனையில் லாரி டிரைவரின் இருக்கைக்குப் பின்னால் 10¾ கிலோ மார்பின் போதைப்பொருள் மறைத்து வைக்கப்பட்டிருந்தது.

இவற்றை போலீசார் கைப்பற்றினர். அதன் மதிப்பு ரூ.11 கோடி இருக்கும் என போலீசார் தெரிவித்தனர். இதுதொடர்பாக 2 பேர் கைது செய்யப்பட்டனர். அவர்களிடம் இந்த போதைப்பொருள் எங்கிருந்து கடத்தி வரப்பட்டது? யார், யாருக்கு இந்த போதைப்பொருள் வினியோகிக்கப்பட இருந்தது? என்பது குறித்து அம்மாநில போலீசார் வழக்குப்பதிவு செய்து விசாரணை நடத்தி வருகிறார்கள்.