சடுதியில் வா முருகா

சிந்தையில் உறை

செந்தூரா!

சண்முகா!

சடுதியில் வா!

சிங்காரவேலவா!

எண்கண் வாழ் முருகா

என்னை ஏறெடுத்துப் பாராததேன்; முருகா!

எட்டுக்குடி முருகா

எனக்கு எட்டாக்கையாய் இருப்பதேனோ ;முருகா!

குன்றக்குடி குடி கொண்ட குமரா!

என் குறை தீர்க்க வாராததேன்; முருகா!

பரங்குன்றம் காத்து நிற்கும் முருகா!

என்னை பரிதவிக்க 

வைப்பதேனோ; முருகா!

திருத்தணிகை கோயில் கொண்ட முருகா!

என்னிடத்தில் கொண்ட கோபம் ஏதென்ன; முருகா!

தென் பழனி ஆண்டிருக்கும் முருகா!

என்னை இன்னும்

ஒரு ஆளாய் நினைக்கலையா; முருகா!

என்ன சொல்லி அழைத்தாலும் முருகா!

ஈராறு செவியிலும்

ஏறாததேன் முருகா!

சாமி மலை வாழ் முருகா!

தேம்பி நிற்கும் என்னை

தேற்றுவாய் முருகா!

சிந்தையில் உறை

செந்தூரா!

சண்முகா!

சீக்கிரமாய் வந்து விடு

சிங்கார வேலா!

சசிகலா விஸ்வநாதன்